2016-04-9 11:24:26 |
Ա. Ալիխանյանի անվան ազգային լաբորատորիայի գիտնականները պատրաստվում են հիմնել երկրաֆիզիակական պարամետրերի մոնիտորինգի հայկական ցանց
Հայաստանի Հանրապետության կառավարությունը Ա. Ալիխանյանի անվան ազգային լաբորատորիային հատկացրել է դրամաշնորհ՝ ստեղծելու երկրաֆիզիկական կարևորագույն պարամետրերի չափման ցանց: Նախագիծը իրականացնում է ազգային լաբորատորիայի Տիեզերական ճառագայթների բաժանմունքը՝ Ամերիկայի հայ ինժեներների և գիտնականների կազմակերպության Միչիգանի գլխամասի ֆինանսական աջակցությամբ:
Մթնոլորտում և երկրի մագնիտասֆերայում աճող դինամիկ երևույթները սպառնում են մարդկային քաղաքակրթությանը նոր վտանգներով` կապված հաճախակի և անկանխատեսելի եղանակային փոփոխությունների հետ:
Երկրի մագնիտոսֆերայի և մթնոլորտի պոտենցիալ վտանգավոր գործընթացների ամբողջական մոնիտորինգը և կանխատեսումը կարևոր է գնահատելու համար ռիսկերը տնտեսության տարբեր ոլորտներում, մասնավորապես, ապահովելու համար բարդ տեխնոլոգիական սարքավորումների (այդ թվում ` միջուկային) անվտանգությունը, որոնց շարքից դուրս գալը կարող է ունենալ աղետալի հետևանքներ և վտանգավոր տևական ազդեցություններ շրջակա միջավայրի և մարդկանց կենսապայմանների վրա:
Երկրի մթնոլորտում պոտենցիալ վտանգավոր գործընթացների մոնիտորինգը և կանխատեսումը շատ կարևոր է նաև ռազմական պաշտպանական համակարգերի, այդ թվում ղեկավարման, դիտարկման, հսկման և կապի միջոցների, էլեկտրոնիկական սարքավորումների, էներգետիկական կայանքների կայուն անխափան աշխատանքի համար, ռազմական տակտիկական և հետախուզական գործընթացների պլանավորման և կատարման համար:
Հայաստանում կլիմայական և մթնոլորտային գործընթացների ֆիզիկայի բնագավառում հետազոտությունների առաջնահերթությունները ներառում են.
• Բարձր տեխնոլոգիական սենսորների և մոնիտորինգի համակարգերի ցանցերի ստեղծումը հիմնական երկրաֆիզիկական պարամետրերի չափման համար:
• Ցանցի շարունակական շահագործման ապահովումը և իրական ժամանակում տվյալների ուղարկումը բազային սերվերներ:
• Տվյալների փոխանցման և պահեստավորման, բազմաչափ արտացոլման և վիճակագրական վերլուծության համակարգերի ստեղծումը:
Երկրաֆիզիկայի հետազոտությունների կատարումը համաշխարհային մակարդակով կզարգացնի Հայաստանում գիտական և տեխնոլոգիական ներուժը, կնպաստի հասնելու հայ գիտնականների գերակայության և կդնի հիմքերը արագ և պատրաստակամ արձագանքելու 21 - րդ դարի աննախադեպ մարտահրավերներին: